ବାରଙ୍ଗ,୨୮/୨୫ : ଦୀର୍ଘଦିନ ହେଲା କୁମ୍ଭକର୍ଣ୍ଣ ନିଦ୍ରାରେ ସୋଇଥିବା ନନ୍ଦନକାନନ ଥାନା ପୋଲିସର ନିଦ ଭାଙ୍ଗିଛି।ପୋଲିସ ବେଆଇନ ବାଲି ଘାଟକୁ ଯାଇ ବେଆଇନ ବାଲି ମାଫିଆଙ୍କୁ କାବୁ କରିବା ସହିତ ୬ଟି ଗାଡି ଜବତ କରି ଘଟଣାରେ ସଂପୃକ୍ତ ବାଲି ଚାଲାଣ କାରୀ ୭ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି।
ସୂଚନାଯୋଗ୍ୟ ଯେ,ଦୀର୍ଘଦିନ ହେଲା ସ୍ଥାନୀୟ ପୋଲିସ ସହିତ ବନ୍ଧୁତ୍ୱ ସୃଷ୍ଟି କରି ବାଲି ମାଫିଆ ମାନେ ଲକ୍ଷାଧିକ ଟଙ୍କା ମୁନାଫା କମାଉଥିବା ଥିଲେ। ଉପରୋକ୍ତ ପ୍ରଶାସନର ଚାପ ବଳୟରେ ଚାପଗ୍ରସ୍ତ ହୋଇ ଶେଷରେ ବାଲି ମାଫିଆଙ୍କୁ କାବୁ କରିବାରେ ସକ୍ଷମ ହୋଇଛି ନନ୍ଦନକାନନ ଥାନା ପୋଲିସ।ବିଶ୍ଵସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ନନ୍ଦନକାନନ ଥାନାଧିକାରୀଙ୍କ ନିର୍ଦ୍ଦେଶ ମୁତାବକ ସମ୍ପୃକ୍ତ ଥାନାର ଏକ ସ୍ପେଶାଲ ଟିମ ଗତକାଲି ରାତି ୧୦.୩୦ ସମୟରେ କଲ୍ୟାଣପୁର ଗ୍ରାମ ନିକଟସ୍ଥ କୂଆଖାଇ ନଦୀରେ ଅତର୍କିତ ଚଢଉ କରି ବେଆଇନ ବାଲି ଚାଲାଣ ଅଭିଯୋଗରେ ନିମ୍ନୋକ୍ତ ସାତ ଜଣ ଅଭିଯୁକ୍ତଙ୍କୁ କାବୁ କରିବାରେ ସକ୍ଷମ ହୋଇଛନ୍ତି।ସେମାନଙ୍କ ଠାରୁ ଏକ ବାଲି ଭର୍ତ୍ତି ହାଇୱା ଟ୍ରକ,ଏକ ଟିପର ଟ୍ରକ, ଦୁଇଟି ଜେସିବି ମେସିନ ଏବଂ ଦୁଇଟି କାର ଜବତ କରିଛି ନନ୍ଦନକାନନ ଥାନା ପୋଲିସ ।ଏହି ଘଟଣାରେ ସଂପୃକ୍ତ ୭ଜନ ବାଲି ମାଫିଆଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ବେଲ ନାମୁଞ୍ଜର ହେବାରୁ ସମସ୍ତଙ୍କୁ ଜେଲ୍ ହାଜତକୁ ଯିବାକୁ ପଡିଛି।
ଉଲ୍ଲେଖ ଯୋଗ୍ୟ,କଲ୍ୟାଣପୁର ନଦିକୁଳ ଖେଳ ପଡିଆ ଠାରେ ଶହ ଶହ ବାଲି ଟ୍ରିପ ଗଦା ହୋଇ ରହିବା ସାଧାରଣ ଲୋକଙ୍କୁ ଚକିତ କରିଛି।ଲକ୍ଷାଧିକ ଟଙ୍କାର ଲଘୁଜ ଖଣିଜ ପଦାର୍ଥ କିଏ ଠୁଳ କରିଛି ଓ କାହିଁକି,ତାହା ତଦନ୍ତ ହେଲେ ସତ୍ୟାସତ୍ୟ ଜଣା ପଡ଼ିବ ବୋଲି ଅଞ୍ଚଳବାସୀ ମାନେ ଦାବି କରିଛନ୍ତି।
